A mestre Robiert Campin pointre pour avoir dorret et ordonnet d’or les fleurs de lis qui sont debous de le grande croix en hault deseure le lichenier de lentrée dou cuer, au deseure du marchiet a lui fait par Laurench Lesenne quy le sourplux donna et asmonna au reparer lad. croix le cruchefit et les deux imaghenes d’empres, ce luy fu payet par traitiet a luy fet pour son amendement de l’avoir fait dor en viers que des coulleurs qui devisées luy estoient par led. Laurench, iiij lb. x s.

A maistre Robert Campin et aultres cy après nommés, pour le fachon et estoffes livrées et mises aux fiertres et confanons des bourgeois de ledite ville, renouvelés, et ledite fiertre viestie à ledite fieste de le proucession de Tournay, les parties et pour les causes qui s’ensuivent. C’est assavoir : à Haynne Carpentier, dit du Bos, pour x onches de soye de pluiseurs tires, mises et employés ès nouviaux confanons, et vj ausnes et vij quartiers de samit, dont on fist les fanons, 37 s. 6 d. de gr. : — item, à Guy le Corneteur, pour xviij ausnes de toille dont on fist les parquiaux des ymages ès dis confanons, et ledite toille avoir cousue, 5 s. 3 d. de gr. ; — item, à Grigor le fustailleur, pour iiij bastons et les pumiaux desdits confanons, 32 gr. ; — item, à Jakem Catau, pour lesdis confanons avoir fais, cousus, appomiés et assemblés, 16 s. 7 d. de gr. ; — item, à Gillart du Mollin, fèvre, pour les fiérures par lui faites et livrées auxdits bastons, 9 gr. ; — item, à luy et audit Catau, qu'il fu donné par courtoisie à leurs ouvriers, 9 gr. ; — item, à Regnaut Hacquet, pour xxxvj ventres de menu vair dont les sambues de ladite fierte furent fourées, 7 s. 5 d. de gr. ; — item, pour une paire de linchieux pour enveloper les confanons, et au casurier de Nostre-Dame et ouvriers de le taille de le fierte et de le pointure, 4 s. 8 d. de gr. ; — item, pour les vins de le carité soustenus par Jehan du Bos et ledit maistre Robert Campin, 12 s. de gr. ; — item, pour le salaire de le paine et travail dudit maistre Robert, d’avoir ladite fierte taillié, faite, livrée, dorée, et poindre et estoffer les parquiaux et ymages desdits confanons, avoir fais fourmes, estoffés et dorés, et aussi les fleurs de lis d’or avecq tous les bastons et pumiaux d'iceux, estoffé et doré les xix pignons des angèles, des ménestriers et trompettes, à deux lés, et bien lxxij escuchons estoffés, par taux et ordonnance faicte pour ce faire audit maistre Robert, 8 lb. de gr. ; — item, pour l'acat de ledite monnoye de Flandres contre blans du Roy, 31 s. ; — lesquelles parties montent en somme, le monnoye de Flandres avaluée à sols et deniers tournois, 87 lb. 17 s. 1 d.

...Est assavoir que icelle deffuncte volt et ordonna par sondit testament après les parties dessus par elle devisées et ordonnées que aux despens de ses biens ses dis exécuteurs feissent faire deux ymages de pierre de taille c'est assavoir de Nostre Dame et de Saint Gabriel, en le longheur de iiij pies cescun ymage, qui seroient mis aux deux piliers de l'église Saint- Pierre en manière de Annonciation, comme de présent avoit de plate pointure esdis piliers, entre lesquels piliers la dicte deffuncte eslisi sa sépulture. Et volt icelle que au pies des dictes ymages fuist escript ce que il appertennois. Et en oultre ordonna que icelles ymages fuissent estoffées de painture comme il appertint. Lesquelles ymagenes sont faites en la dicte église aus dis piliers en accomplissant la volenté d'icelle deffuncte ainsi et par la manière que es mises de ces presens comptes sera cy apries faicte mencion de la coustenge d'icelles en pluiseurs parties.